Бо́же, ми́лостивъ бу́ди мнѣ́ грѣ́шному. (покло́нъ)

 

Бо́же, очи́сти грѣхи́ моя́, и поми́луй мя. (покло́нъ)

 

Созда́вый мя, Го́споди, поми́луй. (покло́нъ)

 

[Безъ числа́ согрѣши́хъ, Го́споди, прости́ мя. (покло́нъ)

 

Богоро́дице Влады́чице Дѣ́во, спаси́ мя. (покло́нъ)

 

А́нгеле храни́телю мой святы́й, отъ вся́каго зла сохрани́ мя. (покло́нъ)

 

Святы́й апо́столе, или́ му́чениче, или́ преподо́бне о́тче, и́мя ре́къ, или́ о́тче Васи́ліе, моли́ Бо́га о мнѣ́.] (покло́нъ)

 

Моли́твами святы́хъ отцъ на́шихъ, Го́споди Ісу́се Хри́сте́ Бо́же на́шъ, поми́луй нaсъ, ами́нь. (покло́нъ)

 

Сла́ва тебѣ́ Бо́же на́шъ, сла́ва тебѣ́. (покло́нъ)

 

Царю́ небе́сный, утѣ́шителю, Ду́ше и́стины, и́же вездѣ́ сы́й и вся́ исполня́яй, сокро́вище благи́хъ и жи́зни пода́телю, пріиди́ и всели́ся въ ны́, и очи́сти ны́ отъ вся́кія скве́рны, и спаси́, бла́же, ду́шы на́ша.

 

Святы́й Бо́же, святы́й крѣ́пкій, святы́й безсме́ртный, поми́луй на́съ. три́жды. (и покло́на три́)

 

Сла́ва Отцу́, и Сы́ну, и свято́му Ду́ху, и ны́нѣ и при́сно, и во вѣ́ки вѣко́въ, ами́нь. (покло́нъ)

 

Пресвята́я Тро́ице, поми́луй на́съ; Го́споди, очи́сти грѣхи́ на́шя; Влады́ко, прости́ беззако́нія на́ша; Святы́й, посѣти́ и исцѣли́ не́мощи на́шя, и́мене твоего́ ра́ди.

 

Го́споди поми́луй, три́жды. Сла́ва, и ны́нѣ: (покло́нъ)

 

Отче на́шъ, и́же еси́ на небесѣ́хъ, да святи́тся и́мя твое́, да пріи́детъ ца́рствіе твое́;  да бу́детъ во́ля твоя́, я́ко на небеси́ и на земли́. Хлѣ́бъ на́шъ насу́щный да́ждь на́мъ дне́сь, и оста́ви на́мъ до́лги на́шя, я́коже и мы́ оставля́емъ должнико́мъ на́шымъ; и не введи́ на́съ во искуше́ніе, но изба́ви на́съ отъ лука́ваго.

 

Го́споди поми́луй, 12. Сла́ва, и ны́нѣ: (покло́нъ)

 

Пріиди́те, поклони́мся царе́ви на́шему Бо́гу. Пріиди́те, поклони́мся Христу́, Царе́ви на́шему Бо́гу. Пріиди́те, поклони́мся и припаде́мъ самому́ Го́споду Ісу́су Христу́, царе́ви и Бо́гу на́шему. (и покло́на три́)

 

Псало́мъ 50:

 

Поми́луй мя Бо́же, по вели́цѣй ми́лости твое́й и по мно́жеству щедро́тъ твои́хъ очи́сти беззако́ніе мое́. Наипа́че омы́й мя́ отъ беззако́нія моего́, и отъ грѣха́ моего́ очи́сти мя́. Я́ко беззако́ніе мое́ а́зъ зна́ю, и грѣ́хъ мо́й предо мно́ю е́сть вы́ну. Тебѣ́ еди́ному согрѣши́хъ, и лука́вое предъ тобо́ю сотвори́хъ, я́ко да оправди́шися во словесѣ́хъ твои́хъ, и побѣди́ши, внегда́ суди́ти ти́. Се́ бо въ беззако́ніихъ зача́тъ е́смь, и во грѣсѣ́хъ роди́ мя́ ма́ти моя́. Се́ бо и́стину возлюби́лъ еси́, безвѣ́стная и та́йная прему́дрости твоея́ яви́лъ ми́ еси́. Окропи́ши мя vссо́помъ, и очи́щуся; омы́еши мя, и па́че снѣ́га убѣлю́ся. Слу́ху моему́ да́си ра́дость и весе́ліе, возра́дуются ко́сти смире́нныя. Отврати́ лице́ твое́ отъ  грѣ́хъ мои́хъ, и вся́ беззако́нія моя́ очи́сти. Се́рдце чи́сто сози́жди во мнѣ́ Бо́же, и ду́хъ пра́въ обнови́ во утро́бѣ мое́й. Не отве́ржи мене́ отъ лица́ твоего́, и ду́ха твоего́ свята́го не отими́ отъ мене́. Возда́ждь ми́ ра́дость спасе́нія твоего́, и ду́хомъ влады́чнимъ утверди́ мя. Научу́ беззако́нныя путе́мъ твои́мъ, и нечести́віи къ тебѣ́ обратя́тся. Изба́ви мя́ отъ крове́й Бо́же, Бо́же спасе́нія моего́, возра́дуется язы́къ мо́й пра́вдѣ твое́й. Го́споди, устнѣ́ мои́ отве́рзеши, и уста́ моя́ возвѣстя́тъ хвалу́ твою́. Я́ко а́ще бы восхотѣ́лъ еси́ же́ртвы, да́лъ бы́хъ у́бо; всесожже́нія не благоволи́ши. Же́ртва Бо́гу ду́хъ сокруше́нъ; се́рдце сокруше́нно и смире́нно Бо́гъ не уничижи́тъ. Ублажи́ Го́споди, благоволе́ніемъ твои́мъ сіо́на, и да сози́ждутся стѣ́ны іерусали́мскія. Тогда́ благоволи́ши же́ртву пра́вды, возноше́ніе и всесожега́емая; тогда́ возложа́тъ на олта́рь тво́й тельцы́.

 

Вѣ́рую во еди́наго Бо́га Отца́, вседержи́теля, творца́ не́бу и земли́, ви́димымъ же всѣ́мъ, и неви́димымъ. И во еди́наго Го́спода Ісу́са Христа́, Сы́на Бо́жія, единоро́днаго, и́же отъ Отца́ рожде́ннаго пре́жде всѣ́хъ вѣ́къ; свѣ́та отъ свѣ́та, Бо́га и́стинна отъ Бо́га и́стинна, рожде́нна, не сотворе́нна, единосу́щна Отцу́, и́мже вся́ бы́ша. На́съ ра́ди человѣ́къ, и на́шего ра́ди спасе́нія сше́дшаго съ небе́съ, и воплоти́вшагося отъ ду́ха свята и Марíи Дѣ́вы, и вочеловѣ́чшася. Распя́таго же за ны́ при понтíйстѣмъ піла́тѣ, и страда́вша, и погребе́на. И воскре́сшаго въ тре́тій де́нь по писа́ніемъ. И возше́дшаго на небеса́, и сѣдя́ща одесну́ю Отца́. И па́ки гряду́щаго со сла́вою, суди́ти живы́мъ и ме́ртвымъ, его́же ца́рствію не бу́детъ конца́. И въ ду́ха свята́го, Го́спода, животворя́щаго, и́же отъ Отца́ исходя́щаго, и́же со Отце́мъ и Сы́номъ спокланя́ема и ссла́вима, глаго́лавшаго проро́ки. Во еди́ну святу́ю, каѳоли́ческую и апо́стольскую Це́рковь. Исповѣ́дую еди́но креще́ніе, во оставле́ніе грѣхо́въ. Ча́ю воскресе́нія ме́ртвыхъ; И жи́зни бу́дущаго вѣ́ка, ами́нь.

 

И Исусова молитва 100 пъти:

 

Го́споди Ісу́се Христе́, Сы́не Бо́жій, поми́луй мя грѣ́шнаго.

 

Въ края:

 

Сла́ва, и ны́нѣ: (покло́нъ) Аллилу́іа, аллилу́іа, аллилу́іа, слaва тебѣ́ Бо́же. три́жды. (и покло́на три́.)

 

Го́споди поми́луй, три́жды. Сла́ва, и ны́нѣ: (покло́нъ)

 

След това започваме още една стотица (100), или:

 

Досто́йно е́сть, я́ко вои́стинну, блажи́ти тя́ Богоро́дицу, присноблаже́нную и пренепоро́чную, и Ма́терь Бо́га на́шего. Честнѣ́йшую херуви́мъ, и сла́внѣйшую безъ сравне́нія серафи́мъ, безъ истлѣ́нія Бо́га сло́ва ро́ждшую, су́щую Богоро́дицу тя́ велича́емъ. (покло́нъ до земята.)

 

Сла́ва, и ны́нѣ: (покло́нъ) Го́споди поми́луй, три́жды. Благослови́.

 

Моли́твами святы́хъ отцъ на́шихъ, Го́споди Ісу́се Хри́сте́ Бо́же на́шъ, поми́луй нaсъ, ами́нь. (покло́нъ)

​